Laias Caldaria Hotel Balneario (Cenlle)

Tipos de augas

Ofrece augas bicarbonatadas-sódicas, alcalinas e hipertermais, a unha temperatura de 52 °C.

Indicacións terapéuticas

terapias dermatolóxicas
reumatismos
rehabilitación e recuperación muscular
afeccións do aparato respiratorio
tratamento do estrés

Programas

bañeiras de hidromasaxe
ducha circular
baño carbogaseoso
chorros
masaxe baixo ducha
piscinas termais de relax
termas de calor seco e húmido
piscinas de contraste
duchas aromáticas e baño de esencias
masaxes tonificantes
jacuzzi
sillóns térmicos

Servizos Hoteleiros

O hotel ten 98 habitacións, 4 adaptadas para discapacitados e 50 con terraza. Dispón de restaurante, salón de banquetes e varios salóns de convencións. O café-bar ten unha terraza con vistas ao río Miño e conta cun salón de xogos. O hotel posúe tamén un bar inglés, que ofrece un recuncho máis íntimo para tomar unha copa ao atardecer, degustar algún cóctel ou un batido de pementos.

Historia

Na zona aprécianse restos de baños romanos. O uso destas augas mineromedicinais prolongouse ata a Idade Media. A principios do século XX construíuse un balneario que quedou asolagado polo encoro de Castrelo de Miño. O balneario actual, inaugurado en 2001, é unha edificación totalmente acristalada, inspirada no voo dunha gaivota, obra de Chaos e Garaizabal.

O Contorno

Cenlle - O Ribeiro

Exterior Laias Caldaria Hotel Balneario

A poboación de Laias, integrada dentro da comarca do Ribeiro, está situada no concello ourensán de Cenlle, á ribeira do río Miño. As terras de cultivo están dedicadas na súa maioría aos viñedos. A parroquia e os seus arredores ofrecen múltiples posibilidades, tanto dende o punto de vista cultural como do medio natural, podendo gozar das súas áreas recreativas, rutas de sendeirismo e zonas de baño.

www.cenlle.es

Xacementos Arqueolóxicos

O territorio estivo ocupado dende antes da chegada dos romanos. Naquel tempo era famoso pola explotación das pebidas de ouro que arrastraba o Miño. Na actualidade consérvase o castro de San Cibrao de Lás, un dos poboados fortificados en proceso de escavación de maior tamaño dos localizados en toda Galicia, que dispón dun centro de interpretación da cultura castrexa. Outro xacemento arqueolóxico é o da Cova da Moura.

Ribadavia

O conxunto histórico-artístico de Ribadavia queda tan só a 8 km, co seu castelo dos Sarmiento, o seu barrio xudeu, as súas igrexas ou o seu museo etnolóxico. Esta vila medieval é un destino perfecto para os apaixonados da natureza, da historia, da cultura e da gastronomía. Como capital do Ribeiro, pódense degustar os seus saborosos viños para acompañar a gastronomía propia da zona.

Ribadavia ofrece a posibilidade de realizar actividades acuáticas como piragüismo, remo, vela, windsurf... no río Avia ou no parque náutico de Castrelo de Miño. Tamén se fan percorridos en catamarán polo Miño. Pódese practicar sendeirismo a través de míticas rutas medievais como a "Ruta da historia do viño e do románico", facer escalada, actividades ecuestres…

O viño

O visitante poderá facer un percorrido por toda a comarca do Ribeiro, contemplando paisaxes de gran beleza, igrexas románicas, pazos, aldeas medievais, adegas tradicionais... sen esquecer a degustación dos viños tan típicos destas terras.