A xornada centrarase no coidado do paciente oncolóxico no contorno termal
A directora de Turismo de Galicia, Nava Castro, inaugurará o evento, que se celebrará o 4 de xuño no Talaso Atlántico de Oia
Santiago de Compostela, 27 de maio de 2021 (Vía Láctea Comunicación).- Con motivo do Día Mundial do Supervivente do Cancro, que este ano se conmemora o 6 de xuño, a Cátedra de Hidroloxía Médica Universidade de Santiago-Balnearios de Galicia promove unha xornada centrada en “O coidado do paciente oncolóxico no contorno termal”. O encontro, que terá lugar no Talaso Atlántico de Oia o vindeiro 4 de xuño, será inaugurado pola directora de Turismo de Galicia, Nava Castro.
Na xornada intervirán Manuel Constenla, xefe do Servizo de Oncoloxía do CHU de Pontevedra, Montecelo; Salvador Ramos, director médico do centro de talasoterapia Talaso Atlántico; Eduardo Ortega Rincón, catedrático de Fisioloxía da Universidad de Extremadura; o doutor Juan Gestal, director da Cátedra de Hidroloxía Médica USC-Balnearios de Galicia; Lourdes Vázquez Odériz, catedrática de Nutrición e Bromotoloxía da Universidade de Santiago; ou Teresa Pacheco, directora da revista Tribuna Termal, entre outros especialistas procedentes de diferentes puntos de España e Portugal.
No transcurso da xornada, os diferentes expertos e participantes abordarán o cancro como “un problema sociosanitario de extraordinaria magnitude” e centraranse nos superviventes a esta enfermidade como “un reto asistencial”. Porase de relevo o efecto inmunomodulador da cura balnearia e achegaranse aos centros termais como modelo para crear un “terceiro espazo” dentro da atención integral ás persoas afectadas de cancro, como “paisaxes terapéuticos” e “entornos naturais saudables”. E destacarase á comunidade galega como pioneira neste eido.
No conxunto de España, a supervivencia do cancro sitúase entre o 55,5 % no caso dos homes e no 67,7 % no das mulleres. O encontro servirá para medir a situación actual dos superviventes a esta enfermidade, que se presenta como novo reto asistencial do sistema sanitario español.
