Balneario de Baños de Molgas

Balneario de Baños de Molgas

Tipos de aguas

Ofrece augas radiactivas, bicarbonatadas, sódicas, silicatadas e oligometálicas. Emanan a unha temperatura de 49 °C.

Indicacións terapéuticas

  • tratamento da reuma
  • traumatoloxía
  • artrite
  • asma, bronquite crónica, sinusite e farinxite
  • litiase
  • hiperuricemias
  • trastornos do sistema nervioso
  • doenzas da pel
  • estrés

Programas

  • baños
  • hidromasaxe
  • piscina
  • chorros a presión e subacuáticos
  • ducha circular
  • parafangos
  • inhalacións, nebulizacións, aerosoles e ducha nasal
  • auga en bebida

Servizos Hoteleiros

O hotel posúe 29 habitacións con capacidade para 48 prazas. Ten calefacción central, televisión, teléfono e internet nos dormitorios. Dispón de servizo médico e dun salón de convencións onde poder realizar todo tipo de encontros. No seu restaurante, cun amplo comedor, pódese gozar da excelente cociña da zona. Situado nun enclave pintoresco, conta con piscina e cun xardín-terraza dende onde deleitarse co contorno.

Historia

A súa orixe romana queda avalada polos numerosos obxectos que se foron atopando durante as escavacións realizadas para a mellora do manancial. O balneario está en funcionamento dende o ano 1873, data na que se construíu o edificio na beira do río Arnoia, con fachada de pedra, restaurada en 2005. Ao longo do século XX o hotel balneario ampliouse en numerosas ocasións, pero sen perder o encanto do tradicional. Na actualidade aínda loce parte do seu mobiliario dos anos 20.

O Contorno

Baños de Molgas

Balneario de Baños de Molgas

O municipio ourensán de Baños de Molgas é a porta de entrada á Ribeira Sacra. Está moi próximo á cidade de Ourense, a tan só 34 quilómetros.

www.ribeirasacra.org

No monumental destaca a súa ponte romana dun só arco, os petroglifos e pequenas cazoletas pertencentes á arte rupestre. O Santuario de Nosa Señora dos Milagres, declarado Monumento Histórico Artístico Nacional en 1982, resulta moi interesante pola súa construción barroca do século XVII. A capela prerrománica de Santa Eufemia de Ambía, de finais do século IX e tamén declarada Monumento Histórico Artístico, sorprende polos detalles mozárabes nas súas ventás.

A vila atópase no “val do Medo” e está bañada por tres ríos: Tioira, Sor e Arnoia, o máis importante. Destacan as súas zonas arboradas, os paseos polo seu contorno, a área de piscinas… todo enmarcado nun ambiente de carácter rural.

Ten un encanto especial a área recreativa de Parque Ansuíña, un lugar sorprendente pola súa beleza e pola cantidade de amieiros que poboan as súas marxes. Conta con coidados espazos para o paseo e unha zona moi ampla para facer churrasco, con mesas de pedra e cafetería. Tamén se pode practicar deporte nas canchas de tenis ou gozar nas piscinas municipais. Ademais, os amantes da pesca atoparán no río Arnoia un lugar idóneo para a captura de troitas, moi abundantes nestas augas.

A fermosa vila de Allariz atópase a tan só 20 quilómetros, o que ofrece unha oportunidade para visitar o seu casco histórico, perfectamente conservado. O proxecto de recuperación integral do conxunto histórico-artístico de Allariz e do seu río Arnoia valéronlle o Premio Europeo de Urbanismo en 1994.

Ademais, o ecoespazo do Rexo é un dos referentes artísticos de Galicia, obra de Agustín Ibarrola. Árbores, pedras, moles de granito e outros elementos da natureza foron pintados polo artista vasco, dando como resultado unha irrepetible obra de arte ao aire libre.

Información

Tipo de aloxamento:
Hotel balneario *

Número de Rexistro Sanitario:
C-32-000353

Temporada de apertura:
Desde finais de febreiro ata mediados de decembro

Enderezo:
Samuel González Movilla, 26
32701 Baños de Molgas (Ourense)
Tel: 988 430 246
Fax: 988 430 405

Correo-e: balneariomolgas@hotmail.com

Web: www.balneariodemolgas.com

Galería